28 février 2008
O DIFÍCIL CAMIÑO DOS FICUS
Conduzo un 127 verde por un camiño ancho coma un elefante, pero ateigado de pólas, ramallos e follas de ficus xigantes. A miña muller pide que paremos porque non deixan de caernos enriba por mor do furacán, pero eu estou certo de que chegarei ao final.
27 février 2008
FOLLAS DE LEITUGA AO PAIRO
A miña muller e mais eu estamos sentados nunha mesa longa, cuberta cun mantel de papel, que compartimos con outros comensais. Eles comen unha sopa de cocido densa en fideo e brillante de graxas. Eu miro o meu prato. Está cheo de auga clara na que aboian tristes unhas follas de leituga. Os demais rin da miña penuria gastronómica.
11 février 2008
UN VOLANTE DE FLOR
Unha amiga da miña muller que está anoxada con ela emprestoulle o seu coche para reconciliárense. O coche ten un volante que está feito cun longo globo rosa ao que se lle deu forma de flor.
UN PLENO DE QUINIELA
O fútbol nunca me interesou alén de seguir os resultados dos meus equipos de sempre. Hai tres días soñei que o equipo vasco gañaba por un 1-0. E non fallei.
03 février 2008
RECUPEREI A BH BLANCA PARA UNHA EMERXENCIA
Esta noite volvín pedalear a BH branca de cando adolescente. Había dúas compañeiras de traballo que tiñan de acudir urxentemente a un lugar nas aforas de Ribadeo para cubrir unha información e convideinas a subir no portaequipaxes para levalas. Metínas pola autovía e empecei a derrapar e facer pinchacarneiros para poder chegar a tempo. Unha vez no lugar, ambas as dúas desapareceran.
UN PUÑO CELESTIAL
Un inmenso puño baixa dende o ceo con unha enerxía descomunal e soamente me fica correr. Iso fago.